Guðbrandur kom 10. febrúar og taldi lömbin í ánnum hjá okkur. Hér á eftir koma til gamans og fróðleiks nokkrar tölulegar upplýsingar varðandi dætur nokkurra sæðinga hrúta. Það eru alltaf einhverjar skekkjur í talninguni en oftast koma fleiri lömb en færri.
Talið var í 19 gemlingum, 2 eru sennilega geldir,9 einlembdir og 8 tvílembdir.
Örvarsdóttirin er tvílembd, af þremur dætrum Papa eru 2 tvílembdar, af þremur dætrum Grána eru 2 tvílembdar.
Af 19 tvævetlum var 1 einlembd og 3 þrílembdar. Báðar dætur Spaks (frá Broddanesi) eru tvílembdar, þrjár dætur Kveiks eru allar tvílembdar, Mangódóttirin er tvílembd en Sómadóttirin er þrílembd og af fimm dætrum Mána eru 4 tvílembdar og 1 þrílembd hver er svo að tala um lélega frjósemi hjá Mána þær voru allar tvílembdar nema ein í fyrra.
Svo eru hérna nokkra niðurstöður um eldri ærnar, af tveimur dætrum Hækils er önnur tvílembd en hin einlembd, Ormsdóttirin er þrílembd (átti hann ekki líka að gefa laka frjósemi )
Af tveimur dætrum Eldars er önnur þrílembd en hin tvílembd þær voru báðar þrílembdar í fyrra (held að Eldar hafi verið misskilin hrútur og alltof lítið notaður ). Af þremur dætrum Hnokka er 1 einlembd 1 tvílembd og 1 þrílembd annars hafa þær verið mjög frjósamar allar einhvertíman verið þrílembdar og ein alltaf þetta eru stórar og myndalegar kindur.
Einu Frosta, Spaks,Stapa, Dreitils, Arfa, og Sekks-dæturnar eru tvílembdar. Kostsdóttirin er þrílembd eins og vanalega dætur Haga og Erps eiga svo báðar að vera þrílembdar.
Eins og sjá má var ég  að læra á þessa blikk kalla  
Vil svo endilega hvetja ykkur til að skrifa á síðuna setja inn myndir og skrifa álit

Nú er síldarkvótinn að verða búinn og við hættum að sjá stóru skipin í fjöruborðinu hjá okkur, það er búið að vera mikið af dauðri síld í fjörunum í vetur, sem hefur laðað að hrafna, og koma þeir í birtingu í stórum flokkum til að fá sér síld, en þeir þurfa líka að leika sér og þá eru nálægar rúllustæður freistandi, hrafninn gatar rúllurnar og leikur sér að því að draga grasið út. Nokkrir bændur hafa lent í þó nokkru tjóni vegna þessarra áráttu hjá hrafninum.

Í logninu í dag fara bændur út í eyjar til að líta eftir fé því sem haft er í eyjum yfir veturinn, en nokkrir félagar hafa kindur í eyjum. Það er farið með þær í október og þær sóttar um miðjan mars, farið er með hrútana eftir 20 des, það ræðst þó af veðri. Fé það sem er í eyjum yfir fengitíð er sagt  frjósamara en í landi, er það sennilega vegna fjörunnar því þar fellur gróður seinna. Eyjarnar sem hýsa fé, þurfa að hafa gott skjól, vatn og góða fjöru, í mörgum  eru hús. Í innannverðum Breiðarfirði eru margar góðar beitar eyjar sem eru notaðar fyrir vetrarbeit.